I sun n grup de studënc y studëntes de Sciënzes dla Formaziun primara. Sciöche insegnanc y insegnantes dl dagní oresson dé n contribut concret ales scolines y scores fajon na proposta de n proiet.

L’idea é nasciüda da na reflesciun sota sön les dinamiches che caraterisëia atualmënter les istituziuns formatives te chësta situaziun de emergënza, mo suradöt sön i debojëgns di aturs prinzipai dla scolina y scora: i mituns y les mitans. Plü avisa orunse se conzentré sön dui aspec. Imprömadedöt odunse la nezescité da se dé jö te na manira plü sota cun la dimenjiun emotiva y afetiva di mituns y dles mitans, che vir al momënt na situaziun particolara y unica, te contesć familiars dër desvalis. N secunt fin é chël de tigní vies y renforzé les relaziuns danter i mituns y les mitans de n grup o de na classa.

Te chësc momënt storich orunse porchël ti pité ai mituns y ales mitans esperiënzes che ti dá la poscibilité da ti dé espresciun a sües sensaziuns y emoziuns.

I un lauré fora trëi propostes de laur generales, da chëres che vigni grup o classa pó pié ia por les elaboré aladô di debojëgns y dl contest spezifich. Por indicaziuns plü detaiades fajunse referimënt al’ injunta.

I oresson ti dé la poscibilité ai mituns y ales mitans da ti dé espresciun a sensaziuns y sentimënc te na manira individuala y tl medem momënt contribuí a na idea de proiet de grup o classa, cun le fin de cherié deboriada n laur. Dal momënt che ara nen vá de na dimenjiun dër intima y personala, podará i mituns y les mitans se anuzé de de vigni sort de formes de espresciun artistica (grafica, dessëgn, pitöra, video…). Al gnará organisé na condivijiun de düc i materiai cheriá y al sará na buna ocajiun por lauré sö cun i mituns y les mitans les esperiënzes viüdes te chësc momënt straordinar.

Le maester Franco Lorenzoni á recordé dan da püch n problem zentral, tanco le fat che i mituns y les mitans ne ará nia la poscibilité da lauré sö sü crüzi por capí, adöm a compagns, compagnes, maestri y maestres, ci che chësc momënt straordinar á rapresenté por ëi/ëres. Por sodesfá chësc debojëgn aratunse che al sides de gran importanza da pité momënc olache les emoziuns viüdes ciafa espresciun te n barat y confrunt cun i atri.

I sun sigüsc che chësta proposta pó ti pité ai mituns y ales mitans n’atra prospetiva, chëra de podëi colauré cun i compagns y les compagnes por ti jí do a n travert coletif, ince sce a destanza.